Menu

Cyflwyno

3.2 - Creu

Cyflwyniad

'Cyflwyno' ydy’r ail agwedd o 3.2 ‘Creu’. Mae’n ymwneud â chyfuno testun, ‘delweddau a fideos i’ch helpu i gyflwyno ar bwnc.

Mae gan y rhan fwyaf o ddisgyblion rhywfaint o ddealltwriaeth o feddalwedd cyflwyno fel PowerPoint, ond er mwyn dysgu’r pwnc o ddifrif mae angen i chi bwysleisio amrywiaeth ac amrediad y dechnoleg.

Fframwaith

3.2 - Creu

  • Creu ac addasu cydrannau aml-gyfryngol mewn un iaith neu fwy gan ddefnyddio ystod o feddalwedd.
  • Addasu a chyflwyno ystod o destun, delwedd, sain, animeiddiad a fideo at ddibenion penodol.

Sgil wrth Sgil

  • Defnyddio amrediad o feddalwedd Cyflwyno gyda hyder cynyddol.
  • Gwybod sut i greu a golygu cyflwyniad trwy ychwanegu, dileu ac ad-drefnu sleidiau a newid lliw a dyluniad.
  • Mewnosod blychau testun, graffeg, sain a ffeiliau fideo i gyflwyniad yn annibynnol.
  • Cynllunio strwythur cyflwyno yn annibynnol.
  • Defnyddio animeiddio rhagosodiad ar wrthrychau.
  • Cyflwyno i gynulleidfa a gwylio enghreifftiau i ddarparu adborth i gymheiriaid.

(EAS ICT Skills Framework)

Geirfa

cyflwyno     delwedd     blwch testun     tocio     ailfeintio     sleid     cefndir     fideo     sail     strwythur     enw ffeil     ffolder

Gweithgaredd 1

Creu Cyflwyniad 2

screen-shot-2016-11-22-at-23-25-50

Rhyw fersiwn o "Lluniwch PowerPoint ar Awstralia / Llewod / Sêr" fu’r wers TGC nodweddiadol i’r rhan fwyaf o athrawon am gyfnod llawer rhy hir. Yn anffodus, mae nifer yn syrthio i’r fagl o dybio bod eu disgyblion yn gwybod sut i ddefnyddio PowerPoint heb i neb ddysgu’r sgliau iddyn nhw erioed. Canolbwyntiwch ar agweddau newydd a diddorol o’r dechnoleg ac fe ddaw PowerPoint neu Google Slides yn werth chweil unwaith eto!

Noder: Mae’r gweithgaredd yma’n dilyn ymlaen o ‘Creu Cyflwyniad’ ym Mlwyddyn 3. Os na ddysgwyd y gweithgaredd hwnnw i’ch disgyblion ym Mlwyddyn 3, efallai y byddwch eisiau dechrau yno.

Paratoi:

  • Gwnewch yn siŵr bod y disgyblion wedi ymchwilio i’w pwnc mewn gwersi blaenorol neu bod ganddyn nhw daflenni ffeithiau clir o’u blaenau er mwyn iddyn nhw allu canolbwyntio ar y sgiliau technoleg yn y gweithgaredd yma.

Gweithgareddau:

  1. Dechreuwch drwy ddangos cyflwyniad enghreifftiol. Fe ddylech drafod y gwahanol fathau o gyfryngau (testun, delweddau, fideo, sain), a strwythur y cyflwyniad (e.e. os mai Awstralia ydy’r pwnc, un sleid ar gyfer cyflwyniad, un ar gyfer hanes, un ar gyfer bwyd, un ar gyfer chwaraeon etc.).
  2. Trafodwch y gwahanol feddalwedd cyflwyno sydd ar gael (PowerPoint, Google Slide, Prezi etc) a sut maen nhw’n addas i’r gynulleidfa dan sylw.
  3. Gofynnwch iddyn nhw greu eu tudalen deitl yn annibynnol. (Fe ddylen nhw fod yn hyderus yn y sgiliau yma ers Blwyddyn 3).
  4. Gofynnwch iddyn nhw benderfynu ar strwythur eu cyflwyniad -faint o sleidiau, pwnc pob sleid etc. Mae modd iddyn nhw naill ai gynllunio hyn ar bapur neu greu sleidiau yn y drefn gywir gyda’r teitlau yn unig yn eu lle.
  5. Yna gofynnwch i‘r disgylion newid dyluniad neu liw cefndir pob sleid, o bosibl i gyd-fynd gyda phwnc y sleid hwnnw.
  6. Atgoffwch nhw sut i ychwanegu blychau testun, ychwanegu, tocio ac ailfeintio delweddau a sut i ychwanegu fideos
  7. Mae’r disgyblion yn creu eu sleidiau, yn mewnosod testun, delweddau a fideos.
  8. Dangoswch iddyn nhw sut i wneud i ddelweddau a thestun ymddangos gydag animeiddio.  Gall y disgyblion ychwanegu hyn i rai agweddau o’u cyflwyniad.
  9. Gwnewch yn siŵr eu bod yn cael cyfle i gyflwyno eu cyflwyniad terfynol i gynulleidfa (hyd yn oed os mai gweddill y dosbarth ydy’r gynulleidfa honno). Diben cyflwyniadau ydy eu cyflwyno! Gofynnwch i’r disgyblion am adborth ar y cyflwyniadau maen nhw’n eu gwylio.

Cofiwch

  • Yn dibynnu ar brofiad blaenorol eich disgyblion, efallai bod pawb yn gweithio ar yr un meddalwedd (e.e. PowerPoint) ond yn y pendraw y nod ydy rhoi hyder i’r disgyblion ddewis pa feddalwedd cyflwyno i’w ddefnyddio.
  • Pwysleisiwch y neges nad ydyn ni’n argraffu popeth, dim ond y gwaith gorffenedig rydyn ni eisiau ei arddangos. Diben cyflwyniadau ydy eu cyflwyno ac nid eu hargraffu.
  • Trafodwch y gwahaniaeth rhwng arbed ar y cyfrifiadur (yn lleol) ac ar y gweinydd (rhwydwaith). Efallai y gallech fynd â nhw i weld gweinydd yr ysgol er mwyn iddyn nhw allu gwerthfawrogi beth yn union ydy e.

Meini Prawf

  • Rwy’n gallu mewnosod blychau testun, delweddau, fideo a sain i gyflwyniad.
  • Rwy’n gallu cynllunio fy nghyflwyniad yn annibynnol.
  • Rwy’n gallu defnyddio animeiddio ar fy nhestun a delweddau.

Elfennau Fframwaith Eraill

1.3 - Hawliau Digidol

Gallwch gynnal trafodaeth am hawlfraint delweddau a sut y dylen ni roi cydnabyddiaeth.

2.2 - Cydweithio

Os ydych yn defnyddio Office 365 neu Google Slides yna gofynnwch i’r disgyblion gydweithio ar gyflwyniad trwy weithio ar yr un pryd ar wahanol gyfrifiaduron.

2.3 - Storio a Rhannu

Mae dysgu eich disgyblion i arbed gwaith yn y ffolder cywir, gydag enw ffeil priodol, yn arbed cymaint o amser i chi yn y pendraw! Cofiwch eu dysgu sut i agor yn ogystal â sut i arbed.

3.1 Cynllunio, Cyrchu a Chwilio

Trafodwch pa allweddeiriau i’w defnyddio pan yn chwilio ar-lein am ddelweddau.

3.3 Gwerthuso a Gwella

Eich asesiad cymheiriaid ac/neu hunanasesiad arferol.

Geirfa

cyflwyno     delwedd     blwch testun     tocio     ailfeintio     sleid     cefndir     fideo     sain     strwythur     animeiddio     enw ffeil     ffolder

Syniadau Amrywio

Cyflwyniad ydy un o’r sgil technoleg mwyaf hyblyg sydd ar gael. Gallwch ddewis unrhyw bwnc yn y byd ar gyfer eich gwers. Ond cofiwch bod rhaid i chi ddysgu’r sgiliau yma; peidiwch â dweud wrthyn nhw am greu PowerPoint yn unig!

Nodyn Pwysig

Rhan bwysig o ‘Cyflwyno’ ym Mlwyddyn 4 ydy rhoi hyder i’r disgyblion i ddefnyddio amrediad o feddalwedd cyflwyno. Felly peidiwch â defnyddio. PowerPoint yn unig trwy gydol y flwyddyn! Ar Hwb fe fydd gennych fynediad i G Suite for Education felly defnyddiwch Google Slides yn ogystal â Powerpoint. Mae Prezi yn feddalwedd cyflwyno poblogaidd arall sydd ar gael am ddim i ysgolion.