Menu

Storio a Rhannu

2.3

Cyflwyniad

Gofynnwch i unrhyw athro/athrawes CA2 beth maen nhw’n feddwl am sgiliau cadw eu disgyblion ac mae’n debygol y byddwch yn clywed straeom am golli amser mewn sawl gwers oherwydd nad ydy gwaith wedi cael ei gadw’n gywir.

Ond does bosib bod oedran Meithrin braidd yn ifanc i boeni am bethau o’r fath?

Wel...nac ydy a dweud y gwir. Er nad oes neb yn disgwyl i ddisgyblion Meithrin fod yn arbenigwyr ar gadw eu gwaith, mae disgwyl iddyn nhw o leiaf ddechrau deall y broses.

Fframwaith

2.3 - Storio a Rhannu

  • Arbed gwaith drwy glicio ar eicon.

Sgil wrth Sgil

  • Dechrau deall bod modd cadw gwaith a chlicio ar y botwm Cadw.

(EAS ICT Skills Framework)

Geirfa

cadw/arbed     agor     botwm    gwaith

Tasg Ffocws

Beth ydy’r Botwm yna?

Y cyfan y mae disgwyl i ddisgyblion yr oedran yma ei wneud ydy dechrau cadw eu gwaith trwy glicio botwm, a’u bod yn deall beth mae cadw yn ei feddwl (h.y. bod modd i chi ail agor gwaith yn nes ymlaen). Y gyfrinach, fel gyda’r rhan fwyaf o sgiliau, ydy dynwared a rhoi cyfleoedd i ymarfer. Dyma rai awgrymiadau:

Syniadau:

  • Wrth agor unrhyw gyflwyniad neu ddogfen sydd wedi’u paratoi o flaen llaw, esboniwch bob amser eich bod wedi eu paratoi yn gynharach, wedi eu cadw ac felly yn gallu ei agor eto nawr. Dangoswch iddyn nhw lle mae’r botwm ‘Cadw’.
  • Pan mae disgyblion yn gorffen gwaith ar gyfrifiadur yn ystod eu hwythnosau cyntaf yn yr ysgol, dangoswch iddyn nhw eich bod yn clicio botwm arbennig i Gadw eu gwaith fel bod modd iddyn nhw ei weld eto yn nes ymlaen. Y tro nesaf y byddwch yn gweithio ar gyfrifiadur gyda’r disgybl hwnnw, agorwch eu hen waith i ddangos iddyn nhw bod clicio’r botwm Cadw wedi cadw eu gwaith yn ddiogel.
  • Gwnewch yn siŵr eich bod yn cynnwys ‘Clicio’r botwm Cadw’ fel rhan o dasg yn gymharol gynnar yn y flwyddyn ysgol, ac o hynny ymlaen, atgoffa’r disgyblion o hynny bob tro maen nhw’n gwneud gwaith digidol.
save

Cofiwch

  • Does dim rhaid i’r disgyblion deipio enw ffeil na dewis lleoliad, dim ond dod i arfer gyda chlcio’r botwm Cadw cyn dweud wrthych chi eu bod wedi gwneud eu gwaith.

Darpariaeth Bellach

Botymau Cadw Ar-lein ac All-lein

Mae angen i glicio’r botwm Cadw ddod yn ail natur i’r disgyblion erbyn y byddan nhw’n gadael y Meithrin.

  • Gwnewch yn siŵr bod yna luniau mawr drws nesaf i’ch cyfrifiaduron o’r gwahanol fotymau Cadw y gallan nhw ddod ar eu traws (yn dibynnu ar y meddalwedd yr ydych yn ei ddefnyddio yn y dosbarth, o bosibl Purple Mash neu J2E).
  • Unrhyw dro y bydd disgybl yn defnyddio cyfrifiadur, boed ar dasg benodol neu fel darpariaeth estynedig, anogwch nhw i gadw eu prosiect.
  • Rhowch fotwm mawr yng nghanol y dosbarth.Pan mae disgybl yn gorffen unrhyw dasg nad yw’n dasg ar y cyfrifiadur, fe ddylen nhw redeg at y botwm a’i daro i ‘Gadw’r’ gwaith.