Blwyddyn 2 - 3.1

Cynllunio, Cyrchu a Chwilio

3.1

Cyflwyniad

Mae’r elfen hon yn cynwys dau gysyniad cwbl wahanol.

Mae ‘cynllunio’ yn cyfeirio at y cynllunio cyn gwneud tasg y byddech yn ei wneud mewn unrhyw bwnc h.y. nodi meini prawf llwyddiant.
Ar y llaw arall mae ‘Cyrchu a Chwilio’ yn golygu darganfod gwybodaeth a chyfrwng trwy dechnoleg.

Fframwaith

3.1 - Cynllunio, Cyrchu a Chwilio

Cynllunio sut i gwblhau tasg mewn perthynas â meini prawf llwyddiant penodol
Defnyddio allweddeiriau i chwilio am wybodaeth benodol i ddatrys problem, e.e. teipio allweddeiriau i beiriant chwilio ac esbonio sut y gall eu dewis o wefan helpu i ddatrys y broblem.

Sgil wrth Sgil

Cynlluniwch waith yn unol â meini prawf llwyddiant.
Chwiliwch am wefan gan ddefnyddio allweddeiriau.

Geirfa

meini prawf llwyddiant cynllunio chwilio allweddeiriau peiriant chwilio

Rhan 1

Cynllunio

Mae’n debygol y bydd eich disgyblion yn cael eu hannog i gynllunio eu gwaith yn naturiol. Does dim angen penodol iddyn nhw ddefnyddio technoleg i wneud hynny. Y peth pwysig ydy eu bod yn mynd trwy’r Meini Prawf Llwyddiant cyn dechrau’r dasg, meddwl am sut y byddan nhw’n sicrhau eu bod yn cyflawni pob maen prawf.

Rhan 2

Cyrchu a Chwilio

Mae peiriannau chwilio yn rhan bwysig o’n bywydau digidol ac fe fydd ein disgyblion yn elwa trwy allu chwilio am wybodaeth yn gyflym ac yn gywir. I wneud hynny, mae angen inni eu cyflwyno i beiriannau chwilio a’u dysgu sut i ddewis allweddair da.

Camau:

Trafodwch sut rydyn ni’n darganfod gwefan ar-lein. Gallwn deipio’r cyfeiriad, clicio ar y dolenni neu ddargafnod gwefan trwy beiriant chwilio. Ydy’r disgyblion yn gallu meddwl am unrhyw wefannau sydd yn gallu eich helpu i chwilio am wefannau eraill?
Esboniwch, er mai Google ydy’r peiriant chwilio mwyaf adnabyddus efallai, bod yna filoedd o rai eraill, rhai yn benodol ar gyfer plant.
Byddwch yn ofalus wrth ddethol peiriant chwilio priodol. Does dim y fath beth â ‘pheiriant chwilio plant’ sydd yn 100% ddiogel. Tra bod y rhan fwyaf yn hidlo cynnwys penodol, mae yna siawns bob amser i bethau lithro drwodd. Yr un gorau rydyn ni wedi ei ddarganfod ydy KidRex (dim hysbysebion ond dim chwiliad delweddau) neu Kiddle (mae ganddo chwiliad delweddau a hysbysebion hefyd). Gwnewch yn siŵr eich bod yn cael golwg eich hun cyn gofyn i’r disgyblion chwilio.
Gofynnwch i’r disgyblion ddarganfod gwefannau penodol trwy deipio eu henwau (e.e. BBC Kids, Cyw, DK Find Out).
Yna, gofynnwch iddyn nhw ddarganfod delweddau o bethau neilltuol (e.e. afalau, uncorn, cestyll).
Tynnwch luniau fel tystiolaeth.