Blwyddyn 4 - 3.2c

Lluniau a Fideo

3.2 - Creu

Cyflwyniad

Yr agwedd Ffotograffau a Fideos ydy’r un mwyaf hwyliog o ‘Greu’ a dyma o bosibl ydy’r cymorth dysgu mwyaf effeithiol trwy’r holl gwricwlwm, ond os caiff ei ddysgu’n wael, gall hefyd wastraffu amser a bod yn ddibwrpas.

Fe fydd y gweithgareddau Blwyddyn 4 yma yn sicrhau eich bod yn dysgu’r sgiliau technoleg cywir ac yn rhoi offeryn defnyddiol i’ch disgyblion ar gyfer recordio eu dysgu trwy gydol y flwyddyn.

Fframwaith

3.2 - Creu

creu ac addasu cydrannau aml-gyfryngol mewn un iaith neu fwy gan ddefnyddio ystod o feddalwedd.
addasu a chyflwyno ystod o destun, delwedd, sain, animeiddiad a fideo at ddibenion penodol.

Sgil wrth Sgil

Recordiwch fideo yn annibynnol a dechrau eu tocio a’u golygu ar yr un ddyfais.
Ychwanegwch deitlau syml a cherddoriaeth ar offeryn golygu ffilm.
Edrychwch ar raglen animeiddio ac arbrofwch gyda golygfeydd ffotograffig i greu animeiddio stop.
Yn annibynnol, uwchlwythwch i yrrwr ar-lein a chreu cod QR, URL byr neu ddull rhannu arall.

(EAS ICT Skills Framework)

Geirfa

recordio fideo delwedd animeiddio stop-symudiad tirwedd uwchlwytho mewnforio allforio

Gweithgaredd 1

Y Fideo Tri Darn

Fe fydd y disgyblion yn gyfarwydd gyda’r Fideo Tri Darn o Flwyddyn 3 (os cafodd ei ddysgu) ac felly gallwch ganolbwyntio ar ymestyn eu sgiliau. Argymhellir bod y gweithgaredd yma’n cael ei ddysgu yn gynnar yn y flwyddyn oherwydd gellir defnyddio’r sgiliau a ddysgwyd drosodd a throsodd wrth i’r flwyddyn fynd rhagddi i ddangos beth maen nhw wedi ei ddysgu mewn gwahanol wersi neu unedau neu i roi barn ar dasg, trip neu sioe.

Paratoi:

Pan fyddwch yn dysgu’r gweithgaredd yma am y tro cyntaf, rhaid canolbwyntio ar y sgiliau technoleg. Felly gwnewch yn siŵr bod gan y disgyblion dri ffaith syml yn barod i’w rhoi yn y fideo.
Mae eich ysgol angen system i gael fideo oddi ar yr iPad (neu dabled) i’w arbed ar y gweinydd neu’r cwmwl. Y dewisiadau cyffredin ydy Google Drive, J2E neu OneDrive.

Gweithgaredd:

Mewn parau neu drioedd, gan ddefnyddio’r ap camera ar yr iPad, ffilmiwch dri chlip. Fe ddylai pob clip fod rhwng 5 – 15 eiliad o hir ac yn cynnwys disgybl yn adrodd ffaith ar un pwnc. Rhaid i bob disgybl gael tro ar ffilmio a rhaid i bob disgybl siarad ar y camera.
Dechreuwch brosiect iMovie newydd, dewiswch Movie, nid Trailer, a dewiswch y tri chlip a ffilmiwyd.
Dangoswch sut i docio’r clipiau trwy dorri allan y dechrau neu’r diwedd. Gofynnwch i’’r disgyblion docio eu fideos (os oes angen) i dorri allan unrhyw gamgymeriadau fel y person camera yn dweud ‘Ewch’ neu’r camera yn symud ar y diwedd wrth iddyn nhw stopio’r fideo.
Ar ddechrau’r prosiect, ychwanegwch ffotograff o’r hyn rydych wedi bod yn siarad amdano. Gellir tynnu hyn gyda chamera neu ei ddarganfod ar-lein a’i arbed i’r Camera Roll.
Ar ddiwedd y prosiect, defyddiwch y botwm ffotograff yn iMovie i dynnu hunanlun o’r plant yn y grŵp.
Ychwanegwch deitlau i’r dechrau, dros y ffotograff. Ychwanegwch y credydau ar y diwedd, dros yr hunanlun
Pan fydd popeth arall wedi’i gwblhau, ychwanegwch gerddoriaeth o’r detholiad yn iMovie.
Allforiwch y ffilm i’r Camera Roll.

Cofiwch

Tair rheol bwysig wrth wneud fideo:
- Rhaid gwneud pob fideo gan ddal yr iPad ar ei ochr (tirwedd). Dysgwch y plant na ddylen nhw fyth ffilmio mewn portread gan mai dim ond rhan fechan o’r sgrin y bydd hynny yn ei lenwi.
- Gan fod iMovie yn ychwanegu pontio rhwng clipiau, mae’n arfer da i ddysgu’r disgyblion i adael eiliad rhwng dechrau ffilmio a siarad. Yn yr un modd fe ddylen nhw ychwanegu eiliad rhwng peidio siarad a stopio’r fideo.
- Gwnewch yn siŵr bod y person camera yn sefyll yn agos at y person sy’n siarad er mwyn recordio’r llais yn glir. Dydy meicroffonau iPads ddim yn gryf iawn.
Arbedwch ddelwedd o chwiliad ar y we yn eich Camera Roll trwy ddal eich bys yn llonydd ar y ddelwedd a dewis ‘Arbed Delwedd’. Mae hon yn sgil holl bwysig i’w dysgu gan ei bod yn angenrheidiol ar gyfer cymaint o brosiectau ar yr iPad.
Fe fydd angen i chi symud y fideo o’r iPad i gyfrif gweinydd eich ysgol neu’r cwmwl (OneDrive, GoogleDrive). Fe fydd bywyd cymaint yn haws i chi os byddwch, yn ystod y tymor cyntaf, yn hyfforddi’r disgyblion i wneud hynny eu hunain!

Meini Prawf

Rwy’n gallu ffilmio clip fideo, ei fewnforio i olygydd ffilm a’i docio.
Rwy’n gallu ychwanegu teitlau a cherddoriaeth i fy ffilm.

Elfennau Fframwaith Eraill

1.3 - Hawliau Digidol

Gallwch gynnal trafodaeth am hawlfraint delweddau a sut y dylen ni roi cydnabyddiaeth.

2.3 Storio a Rhannu

Mae dysgu eich disgyblion i allforio i camera roll ac yna cael y gwaith oddi ar yr iPad i weinydd neu i’r cwmwl yn arbed cymaint o amser i chi yn y pendraw!

3.1 Cynllunio, Cyrchu a Chwilio

Trafodwch pa allweddeiriau i’w defnyddio pan yn chwilio ar-lein am ddelweddau.

3.3 Gwerthuso a Gwella

Gwnewch yn siŵr bod y fideos yn cael eu chwarae i weddill y dosbarth fel eu bod yn gallu rhoi adborth. (Dim ond rhyw 30 eiliad y bydd pob fideo yn para.)